Ki Agom

Nagtutururo an su’lot mong palda;

Basa-basa an buhok mo; nagbuburulos

An basa sa angog mo,

Saka sa pisngi mo;

Nagtatarakig an ngabil mo;

Mari digdi—nagparasain ka, Ne?

Nagparapauran ka na naman pauli?

‘Tukaw ka digdi;

Hubaa an blusa mong tumtom

Na nin lipot kan uran.

‘Punasan ko an payo mo; ‘paimbungon

Ko an mga kamot mo; ‘painiton

Ko an hawak mo. Nag-aalusuos na

An sinapna ta. ‘Gatungan ko

Ining kalayo ta. Kaipuhan saimo

Igwang bagang dai masisigbo

Dawa’ magparapauran ka pa;

Dawa’ na magparapauran ka pa.