Biernes Santo

Nagpoon na an drama kan mga Hudyo sa radyo, nagdadangog an aki. Sa bintana nata’naw niya paturuyatoy na an mga taga-barangay sa tuytuyan na linagan nin telon sa natad sa may bisita. Makikidalan sinda mapalabas an kapitan kan Ten Commandments. Bago naghali an Tatay kan aki para mag-Disipulo sa kapilya, tinugon siya. Mayo nin malaog ngonyan sa tinapayan. Mayo siyang pinalutong tinapay kansubanggi. Sa agang hapon na pinapabaralik an tumatawo sa bakery. Nag-abot si ilusyon kan katabang nindang si Jonalyn. Hali pang detachment sa Maysalay. Sabi kan daraga sa aki duman niya daa padagoson an bisita sa panaderya. Dai naggirong an aki. Sige na an drama kan mga Hudyo sa radyo. Nagdadangog an aki. Daing sabi-sabi an mag-ilusyon nagsarado sa panaderya. Pagkalaog ninda sa tindahan pigpaparahadukan kan Cafgu an daraga. Dai nakakasayuma an babaye sa purusog na pamugol kan bisita. Dai nagdugay, an irarom kan estante nagpaparayugyog, an mga hurmahan kan katitinapayan saro-sarong nagkakahurulog.

Primerong Lugar sa Kategoryang Rawitdawit
Enot na Gawad Obrang Literaturang Bikolnon
17 Abril 2012, Ciudad nin Naga

Sarong Bánggi

Kan sarong bánggi, pinunasan akó

ni Tátay tapos sinabihan, dai daa

‘ko magparabatad o mágparakáwat

maski sain.Piglabaran niya man

si Dódoy; tapos pinainóm kami

kan gina’ga niyang lákad-búlan.

Itong sunod na bánggi, 

matanga na nag-abot si Nánay.

Nagimata kami kan nagriribok; 

nag-iiriwal sinda ni Tátay.

Dai kaya dáa pigmamarángno 

an mgá áki nindá. Kayá dáa 

kamí kinákaralintúra na saná.

Baad mayong gibohon si Nanay 

para kami marahay. Sa aga, 

baad matanga na naman siya 

mag-uli hali sa madyongan. 

Baad apudon na naman ako 

ni Tatay sa papag, tapos kuguson, 

tapos hadukan, tapos babawan. 

Kun maghibi ako, baad kásturan 

naman ako ni Tátay. Baad sa aga, 

garó na naman ako may hílang.

Ugayong ni Uryol

Pirang taon ta kang pinaistar sa harong ko.
Tinata’wan ka pa nin balon kun natitikapo.

Kun kamong magturugang mayong kinakarakan
Dinuhulan kamong sud-an hali sa sakong karihan.

Kulang na lang nganing hurungitan ko kamo.
Sako baga an dalagan mo pag mayo an ina nindo.

Ano man an pinakakan saimo kan ilusyon mo?
Lingaw ka nang ika an matuang aki kan tugang ko?

Saimo sinda maasa, Noy, gabos sa pamilya nindo.
Dai man daw linumay ka kan babaying ito?

Dai na pati kamo nasupog sa itsura nindo.
Nakaabra-siete daa, parasad-pasad sa kanto.

Dai ka pa baga tapos, Noy, dai mo girumdon?
Tapos ngonyan, daog mo pa an may agom.

Ako baga an nagparatustos sa pagpaadal saimo.
Tapos naaraman ko nang nagsasaro na kamo?

Lintian! Badong, dai mo ko pagprobaran,
‘Baad an kasaruan mo sakong makasturan.

An utang na boot, Noy, dai puwedeng bayadan.
Pero kun kamo kan babaying ito an magkadagusan

Sisingilon ta ka nanggad kan saimong mga utang.
Maglikay ka, Noy, ‘baad an ina mo an mautsan.