Pagpuli sa Bagacay

Pag-Deciembre dai ka na puwedeng mag-uli

Sa dakulang harong. Sa mga enot mong aldaw duman,

Matarakig ka sa katre mo pagkakaaga; saka kun magparauran

Na nin makusog, matata’kan ka kan manlaen-laen na bagay—

Mga bintana parasa’, an lanob garaba’, an atop nagtotororo.

Kun magparauran nin makosogon, mahaha’dit ka pa

Sa pagkadakul-dakul na basura—mga dahon saka sanga

Mga bagay, daga sagkod laboy aatongon kan baha kaiba

Kan mga gapo sagkod garadan na manok—na maralataw-lataw,

Tapos mapalibot sa saimong natad.

Maghanap ka na sana nin ibang lugar,

Duman sa mayong duros na mapatakig saimo pagkakaaga;

Duman sa dai ka na maparahadit pa sa kadakul-dakul

Na bagay pag nagparauran na nin makusog.