Girok: Erotika, 2017

An Girok: Erotika sarong librong katiripunan kan mga rawitdawit, halipot na usipon, dakitaramon, iskrip sa pelikula, komposisyon asin obra kan mga Bikolanong artista. Nasa nobentang mga Bikolano an nag-arambag tangani na mahaman an antolohiyang ini.

Pigpublikar an librong ini kan Kabulig Bikol, Inc. sa pakikipagtabangan man kan V.C. Igarta Foundation for the Arts, New York, U.S.A. Ipiglunsar an librong ini kan Enero 2017 durante kan ika-limang Pagsurat Bikolnon na ginanap sa Camarines Sur Polytechnic Colleges, in Nabua, Camarines Sur.

Ini an nagkakapirang mga tuyaw manungod sa libro

“Harayo-harani an hiling, parong, tanog, namit, hapiyap kan puso asin sensibilidad. Ini an duon kan Girok: senswal sa laman, nangkikitik; senswal sa isip, nagpapangalas, nagpapalayog. Mateng-matè ta an arualdaw nagdadanay sa hararumon na bubon, sa dakulaon na natad. An tikwil kan dagâ nagigin osipon nin mundo. An sagid kan tagiti nagigin masulog na salog. An huringhuding kan panganuron sa banggi nagrarawitdawit kinaagahan. Ta girok man nanggad an duon kan sensibilidad Bikolnon. Pirmi nang may tama, may masiram na pulikat.”—Merlinda Bobis

“An Girok bakong saro na naman sanáng katiripunan nin mga pagsurat Bikolnon kundi sarong napapalain na pagkadukay kun pànong an imahinasyon—urog na idtong napapalinya sa eros—pwedeng magin sarong paagi nin pasaysay na arte na malighang minakitik sa agimadmad kan parabasa, alagad minatukdo sainda na masabutan an kahulugan kan mga bagay-bagay na danay kutâ sanáng malibog asin harayo.”—Greg Castilla