Ma, pasensya dai na ko nakapaaram kanimo amay-amay pa si first trip; marhay ngani ta nakasakay ako. Dai ta ka na pigmata paggios ko ta turog-turog ka pa, pagal-pagal kakaaling ki Nonoy pirang ngitngit na man nagpaparapastidyo; pero kun kinakarga ko, pwerte man baga, nag-aalu.
Baydon ko na sana tibaad yaon na man ko diyan sa Sabado. Pero sabi mo man ngonyan na semana tibaad mag-abot na si Onding ni Manoy Jeremias. Marhay kun siring ta igwa na kitang mawalatan kan mga igín.
Digdi sa eskwelahan, siribot naman kami ngonyan ta gusto kan mga maestrang mag-Christmas party kaiba kan mga magurang sa plaza—apwera pa kan sa mga kaakian. Nahugos na kanamo an PTA kaya dakulon gibohon ko digdi. Mga lesson plan ngani dai ko pa ubos macheck-an. Pero marhay man ta igwa ako digding masarigan.
Kansubanggi—iparayo nin Dios—nagralaen naman si pagmati ko. Nagimata ‘ko sa init; ginagaranot ako; basa-basa si sakong ulunan, tumtom pati higdaan. Pero tinutumar ko si bulong na pigreseta kadto sa Naga. Dai ka na maghadit ta maboot man si May Peling; pinapatundugan niya ko ka’yan sa mga aki nin pangudtuhan o minsan mirindalan.
Sunod na semana, makompleanyo ka na baga kaya mighulat ka sana, Ma; ako kanimo may surpresa.
.jpg)
