Biernes Santo

 

Natapos na an gabos na pabasa

Sa barangay ngonyan na Huwebes Santo.

Maimbong an huyop kan duros,

Nag-aagda sako para maglamaw sa turogan.

Sa harong na malinig, mahalnas, makintab,

Naeenganyar akong maghurop-horop nanggad

Kan gabos kong nagkagirinibuhan—magpoon

Kan nag-aging Biernes Santo kan sarong taon

Asta ngonyan—penitensya ko an maihatag sa iba

An gabos na maitatao—boot, bu-ot,

Kapakumbabaan, pag-intindi, pasencia,

Kasimplehan, pagtiwala o kumpiyansa

Libertad, leyaltad, kusog, kalag.

Mahigos an isip kong maghurop hurop

Kan sadiring sala. Kaya dawa dai pa ngani

Nakabayad nin income tax—mayong tawong

Mamimirit na singilon ako kan sakong moroso

O ano pa man na kautangan ta an mga ini

Binayadan na—ako binalukat na

Kan sarong tawong nagsakit, pinasakitan

Ginadan—haloy nang panahon

Sa Kalbaryong sakong dinudulag-dulagan.

 

 

Bitoon, Jaro, Iloilo

Good Friday 2008