Sarong Bánggi

Kan sarong bánggi, pinunasan akó

ni Tátay tapos sinabihan, dai daa

‘ko magparabatad o mágparakáwat

maski sain.Piglabaran niya man

si Dódoy; tapos pinainóm kami

kan gina’ga niyang lákad-búlan.

Itong sunod na bánggi, 

matanga na nag-abot si Nánay.

Nagimata kami kan nagriribok; 

nag-iiriwal sinda ni Tátay.

Dai kaya dáa pigmamarángno 

an mgá áki nindá. Kayá dáa 

kamí kinákaralintúra na saná.

Baad mayong gibohon si Nanay 

para kami marahay. Sa aga, 

baad matanga na naman siya 

mag-uli hali sa madyongan. 

Baad apudon na naman ako 

ni Tatay sa papag, tapos kuguson, 

tapos hadukan, tapos babawan. 

Kun maghibi ako, baad kásturan 

naman ako ni Tátay. Baad sa aga, 

garó na naman ako may hílang.