Delusions of Grandeur

Bantaak an init kan saldang sa Avenue, kaya hali sa luwas mainiton nagdadaradalagan ka palaog sa Ateneo. Patuyatoy ka sa Xavier Chapel. Malipot-lipot sa laog kan Chapel. Nahayahayan ka. Tuminindog ka sana sa gilid, harani sa pinto.

 

Nahiling mo an dakulang missal nakahulid sa entrada sa taid kan benditadong tubig sa may confessionario. Igwang ibang mga nagpaparangadie. Natrangkilo ka yaon nahihiling mo an dakulang Krusipiho nakasa’bit sa altar sa puro.

 

Diyos ko, dai Mo man po ‘ko pababayaan. Ta’wi man po ako nin kusog nin boot, linaw nin isip—sa gabos kong gigibohon sa ngonyan. Ama Niamo.

 

Pagluwas mo sa kapilya, nataka ka. Yaon an istatwa ni San Francisco Javier, sa gilid kan pinto palaog sa Wooden Building nakatungkahal kapot an krusipiho. Igwang nagsisirisilyab sa saiyang lalawgon, igwang garo nagsisirisirilyab sa saiyang lawas. Bagá na riboribong liwanag an naghahale sa saiyang hawak.

 

Daing untok na garo riniritrato an Santo kan kadakuldakul na cameraman sa luwas kan Four Pillars. Ano daw yan? Tibaad nagmimilagro an Santo (saimo), saboot mo. Sabi mo nagtataong-galang gayod an Santo sa Ginoo. Nagkiling ka sa luwas, tibaad kun saen hali an mga nagriritrato.

 

Nagbagting nang ala una.  Mapoon na an Practical Arts ki Mrs. Dayan.  Lakaw na, sige na. gwang garo nagsunson saimo.

 

Palaog ka sa klase, dai ka napapanultol. Nagmilagro gayod sako si San Francisco, saboot mo. Magayon palan digdi sa Ateneo. An mga milagro ordinaryo.

 

 

 NA(GKA)SALA NIN MAKURI SA HUNA HUNA

An garo riboribong liwanag na nagsisirisirilyab hali sa salming kan mga salakyan na minaralaog sa Ateneo, sagkod mga tricycle na nagdadaralhog nin mga pasahero sa may trangkahan kan eskwelahan. Huna mo sagkod na sana an pagtaong-galang kan tawo sa Santo. Huna mo nagmimilagro saimo an Santo. Huna mo an milagro ordinaryo.