An Magayon Na Tibaad Mangyari Satong Duwa Susog Sa Librong Binabasa Ko Dies Minutos Bago Ako Magsaka Sa Bus Pauling Naga Tanganing Mahiling Ta Ka Giraray

Namomotan ta ka. Anong buot silingon sini? Ma’wot kong buhay ka para sakuya sagkod ma’wot kong buhay ka para sa sadiri mo. Ma’wot  kong buhay ka. Ma’wot kong yaon buhay ka susog sa paging ma’wot mo. Ma’wot kong yaon ka na mayong nag-uulang saimo.

Mantang ibinibiklad mo sako an sadiri mo, sa tubang ko, minayaman an buhay ko. Nagiging mas buhay ako. Namamatian ko an sadiri ko na yaon sa mga bulutangon na pinapapangyari mo; nagkakaigwa nin saysay kag kahulugan an buhay ko.

Saro kang palaisipan na ma’wot kong maliwanagan. Alagad dai ta ka mapagibo nin ano pa man. Maaagda ko sana man asin mabibiklad mo sako an palaisipan ini. Ma’wot kong mamidbidan ta ka, namomo’tan ko. Ta nganing mamidbidan ta ka, kaipuhan mong magpahiling. Magpamate. Magparamdam.

Ta nganing mabiklad mo sako an palaisipan na, kaipuhan na magtiwala ka sako na igagalang ko ‘ni, o an mga ini. O maoogma ako sa mga ini. Magin ini amo an pagdata kan hawak mo sa lawas ko, bagay na dai ko pwedeng masabutan kun dae pa nangyayari. Magin ini iyo man an saimong ginapanumdom, iniimahenar, pinagpaplano, o namamati.

Ngaa mapamidbid ka kan sadiri mo sako kun dai ko man muya, okun ma’wot ko sana man gamiton ta ka sa mga obhetong dai ko ginasiling saimo? Mamimidbidan mo ko, an nagahambal na namomoot saimo.

Kun mimidbidon mo ko, kaipuhan kong magpabisto. Kaipuhan ipabisto ko saimo an sadiri ko, an pagkatawo ko, sa pakikipag-ulay, ta nganing magkamidbidan kitang dungan. Mantang pinapabisto mo sako an pagkatawo mo, nagkakaigwa ako nin ideya manongod saimo, na pag-uban-uban maagi sana, huli ta sa amo nga tiempo, daw naga-ilis ka na. Kun makikipag-ulay giraray ako saimo, an nagligad nga ideya ko bako nang matuod, kaya kaipuhan ko na ataduhon giraray idto, dangan pauro-utro.

Kun ika nagatalubo, na mayo nin ano man na kaulangan o nag-uulang saimo, makikibot na sana ako. Paparibongon mo an ulo ko, dangan baad mayad man sako.

Kun namomotan man nanggad ta ka, namomotan ko an mga ginigibo mo, huli ta sinda gikan saimo. Pwede man na tabangan ta ka kun muya mo. O pabayaan ta kang gibuhon mo sana ni nin solo, kun ini makahulugan saimo. Igagalang ko an mga kama’wotan mo sa mga butang na amo ni.

Kun namomo’tan ko an sadiri ko, namomo’tan ko an mga gibo ko, huli ta sinda buhay ko. Kun namomo’tan mo ko, tugot ka sa mga ginaobra ko; tinatabangan mo kong maobra sinda, dawa an boot silingon sini ako sana an magibo. Kun gibohon mo na pugulan mo ko, dai ka namomoot sako. Kun pugulan ta ka, dai ko namomoot saimo. Mayo nin kaipuhan mag-ulang saimo, sagkod tinataw’an ko nin saysay an saimong libertad. Mayo man nin mag-uulang sako, asin tinataw’an ko nin saysay an sadiri kong libertad.

Ako sarong lawas. Ako yaon sa lawas. Siring man ika. Ma’wot kong yaon ako, igwang lawas. Muya ko an lawas mo, an pagigi mong lawas. Kun dai ko muya an atado mo, o pagkaatado mo, hahambalan ta ka. Ta an pagkamoot niyato, katotoohan.

Saro akong sexual na linalang. Siring man ika. Kitang duwa naobra nin sarong bagay na masiram, magayon kag marhay para sa aton nga duwa. Inaagda mo kong mamidbid ta ka sa paagi kan lawas ko; inaagda ta kang mamidbidan mo ko sa paagi kan lawas ko. Sama’ kita sa masisiram kag manana’gum na puwedeng tang ipapangyari, sa kasiraman, sa kana’guman.

Kun muya mo ko tapos dai ta ka gusto, dai ko pwedeng magbalu’bagi. Nagsasabi sana kan totoo an lawas ko. Dai ta ka makukua kun dai mo itatao sako an sadiri mo. Dai man puwedeng maghambog an lawas mo.

Kun mahihiling dangan madadangog ta ka, orog na mamimidbidan ta ka kaysa kun mahihiling ta ka sana. Alagad kun kaputan ta ka, parungon ta ka, namitan ta ka, mas orog ta kang mamimidbid. Alagad dai ka matugot na gibohon yan saimo kun mayo kang tiwala sako, kun habo mong mabisto ta ka man nanggad.

Susog sa Transparent Self. Ni Sidney M. Jourard. New York, 1971, 52–53.

Sinurublian sa Hiligaynon

Silingon, sabihon

Sini, kaini

Kag, sagkod, asin

Amo, iyo

Ginapanumdom, iniisip

Ngaa, ta’no, nata’

Okun, o

Ginasiling, sinasabi

Daw, garo

Naga-ilis, minahira, minasangli

Nagahambal, nagsasabi

Sa amo nga tiempo, sa oras na’yan,

Nagligad, nakaagi

Nga, na

Matuod, tama, sakto

Makikibot, mabibigla

Ulo, payo

Mayad, marhay

Butang, bagay

Hahambalan, sasabihan

Naobra, (mi)nagibo

Aton, satuya

Copyright 1998–2011