Miling

Ni Raphael Francis Saavedra

Kan aldaw na magadan si Miling, nagkakurubhan si mga taga-Bagacay sa kurahaw ni Eta, an saiyang esposa.

Tanda ko pa si kinurahaw ni Eta kan aldaw na idto—“Miling, dai ko na ika mahahadukan sa saimong payo!”

An payo kaya gayod ni Miling ginikanan kan manlaen-laen na dunong kan saindang anom na aki—Emma, Junior, Salvador, Ofelia, Manuel sagkod Antonio. Sinasabi man na an payo ni Miling nanganaan kan mga illegal logger asin ginibo ining airport.

Si Miling. Beterano, maestro, ama, lolo. Principal kan barrio. Bantog si Miling sa Bagacay sa apod na “Sir”—idolo kan mga tao, idolo kan mga engkanto.

Dai ko man nanggad malilingawan si Miling—kinakatakutan nin mga paratatsi; linilikayan kan mga mayong ugali. Dawa sa mga makuapo niya an pagdisiplina sagkod na sana.

Sarong beses, pinaruluhod niya si apat kong tugang sa atubang kan Sagrado Corazon—dahil sa sala kan saro nadamay si tolo ta nagpaparangirisi kaya. Nagparangisi man ako alagad dai ko nakabale ta nagsasapna kaya ako.

Igwa man vez na ako an igwang nakadulak na tugang. Kaya pinaarapod niya kami sa libod. Poon alas nueveng agang sermon abot sinarom, saro sana an nasabutan ko sa halabaon na sermon—pasensya. Dawa daa agrabyado, [mag]pasensya.

Dai ko ito naiintindihan kaidto alagad kan mawara na siya, saka sana tuminadom an hulit niya sako. Pasensya. Dapat halabaon an saimong pasensya. Iyan gayod an dahilan kun ta’no dai siya malingawan kan mga tawo digdi sa lugar mi.

Kan siya magadan sa Aldaw nin Pagkamoot, nakatiriwi, mangkakanos kan mga lalawgon kan mga taga-Bagacay. Kan magadan si Miling, pati an kinaban nakisumaro sa paghibi kan mga engkanto.

Kan aldaw man na idto, nakanood ako saiya—tighurophurop ko si mga tigsabi niya sako. Ngonyan siya saro na sanang istorya.

Dios mabalos po, Lolo Miling.

Sarong pagsalingoy sa nakaagi ni Emiliano Saavedra, Sr., sa minsan na pag-iribahan mi duman kun saen ako nagpoon.

 

Emiliano Salvosa Saavedra, Sr. (05 Enero 1915–14 Febrero 1997)