Chiaroscuro

Sa banggi an kadaihan nin ribok

minapatarom sa bagting nin oras

kan simong pagturog.

An simong daing pundong pagngalas

sa kadikloman nin langit minapasabong

na ika palan matakton

pag an dating mararambong

na liwanag nin mga bituon

natatambunan nin mahibog na ambon.         

          Kagurangnan kong Diyos! Pumondo ka

na nganing kahihiling sa diklom.

Pabayae an saimong aldaw

maging ribayan nin saldang asin uran

ugma asin kulog sa simong kalamnan

verso asin pangadyi nin saimong kalag.

Baka igwa diyan nin anghel sa kadikloman

na nagtao nin kasimbagan paramientras

na ika nakaluhod, takot na minatubod.

Ngonyan an simong puso buminilang logod--

mga tiket, mga sinurat, mga ritrato,

mga subang nginisihan, mga kinantang lahos

miski ngani mga serbesang nainom--mamate lang

kun ano man yan senyal nin Diyos.

Na sa kadikloman an Diyos. Sa buhay.

Pero hilinga--an langit minaliwanag giraray

pag minahulog an uran, ini minasalak

sa daing-pundong hinangos nin dagat; an burak

minahalat sa saldang asin an saldang minataong buhay

sa daga asin sa tubo nin kakahoyan

asin an banggi minagayon pag simong nakakaptan

an nagbabados na tulak kan simong namomotan

na padagos minahangos sa kasulok-suloki

kan saimong kalag.

                         Asin duman sa dai ta aram

na istaran may sarong anghel sa kadikloman na dai

makatubod sa nadadangog niyang daing-pundong

bagting nin simong puso.

--ni Rudy Alano, "Sabihi Daw Ko, Padi Kun Ano Man Ning Sinasabi Tang Buhay."

Sinusog hali sa Haliya: Anthology of Bikol Poets and Poems

ni Ma. Lilia F. Realubit, NCCA, mayo nin petsa.

*Chiaroscuro (Italian for light-dark), noun.

In art, is characterized by strong contrasts between light and dark,

usually bold contrasts affecting a whole composition.