Do Not Judge the Book. Buy Each Cover

Ining mahibog na paperback 
obra kan babaying nakablusang puti—
“our ground time here will be brief”

an titulo niya, kaya gayod an author 
mismo an yaon sa enot na pahina.

Ini man saro enot daang collection 
kan hoben na author kaya siguro 
mahipis man sana. Tubig an yaon 
sa prantera—kun basahon mo garo 
an mga obra maestra, barasa-basa 
an papel kan gabos na tawo saiya, 
lamos-lamos kaanggutan an kada rima.

May sarong tinatakan na “discarded”—
tapos sabi sa likod, magayon daa 
an naenot niyang libro, poetry selection 
kan 1972. Dai mo tulos maburubuklat 
an cover, first name kan author peter.

Igwang saro na gibo daa nin poet lauriat—

baad may mga appetizer an tula niya, 
o igwang epigraphs kada chapter ninda—
dangan haralabaon an iba, o an pira 
pinangararan niya sa amiga; mas gwapa 
kun raging an mga tsismis sa iba—
dai ka mangalas, garo mahihinggustuhan ka.

Magayon ining saro ta garo kadakul 
pangyayari sa saro sanang tema—
an ama kan kag-obra. Tibaad nagkahilang 
si ama niya, tapos narahay. Tapos nagkahilang 
giraray, tapos narahay. Tapos nagadan. 
Sa huring pahina, nagpaparataram an ama 
sa irarom kan daga—kaya gayod an cover 
niya, garo dai matapostapos na lapida.

Sa blurb man kan saro, kan ginigibo daa 
kan author an mga obra, tinabangan siya 
kan sarong anghel. Haloy man siguro sindang 
nagdurog kan saiyang musa; kan dai na 
nagkauyon sa sarong metapora, tinuwadan siya 
kan nasabi nang kapareha; kaya mayo nin ibang 
yaon sa cover niya, kundi balukag na sana.