Horophorop

Susog sa “Meditations” ni Frances K. Ng

2000


Sa lindong kan mararambong na acacia,
Tinitiripon ta an mga simbolo
Kan mga nawara tang mga sadiri.

Sa lugar na ini kita trangkilo.

Sa limpoy, an mga lakad ta
Pasiring bako man sa pagsosolo-solo,
Bako man parayo sa pagsolo-solo,
haman na man kitang solo-solo.

Digdi iling tang nakikipagkawat an doros sa mga daon
Sa palibot niato, nadadangog ta an doros sa satong hinangos.

Nadudu’tan ta an kalayo kung kita nagkakapotan,
Dangan narerealizar ta an kalayo dai nakakapaso
kundi nakakatanyog.

Sa papel nakakapotan ta an init kan saldang,
Sa papel minadahilig an gabos tang katotoohan.

Kita man nanggad tubig, daing linderos, nagbabahod-bahod,
Nag-aantabay tibaad igwang sirang magpulag,
mabahod an doros na satong hinangos.

Nagi na man nanggad kitang mga Elemento.
Huna ninda kinorondenar na kita. Pero dai.

Sa pagtalbong kan mga pangaran ta sa daga na iyo man sana kita,
Nagigi na kitang mga amigo kan kadlagan kun saen kita sigeng rabas.

Bakon man peligroso an kalayo ta an tubig nagsisigbo.
Bakong bagyo an doros kun an kahoy pusog.
Bakong delikado an tubig kun an doros na nagpapahangos nanggad sato,
dawa sa madiklomon nang danaw.

Asin an daga iyo man giraray an inulnan ta,
Dawa ngani kita namundag na.

January 30, 2002