Sa Pinsan Kong Taga-Dayangdang Pagkabagyo

Nabasa mi ni Manay mo—sa Bicol

inaratong daa ni Milenyo

an kabuhayan kan ribo katawo.

Sana dai man kamo

nalantop diyan sa Dayangdang.

Maski para-pa’no

sana nakakaantos man

kamo ni Nonoy saka ni Jun.

Samo na Manay mo,

pag-uuran na ‘yan

nagtutururo an kisame

ano pa minarugi

an minsan ming pag-ibahan,

pasalamat ako ta

pagkakatapos kan uran

may nasasalod kaming

tubig sa banyera

sa gilid kan sagurong,

nagagamit ming

pambagunas sa dalnak

na natipon sa salang

linalantop nin baha.

Masa’kit ta minsan an tubig-baha

minaabot sa may hagyanan

pirang pulgada na sana

an langkaw kan samong turugan.

Katatapos pa sana kan

sarong makusog na bagyo,

sabi sa radyo, igwa na naman

nagdadangadang.

Mag-andam kamo, Ne,

dai nanggad pagpaapgihi si Nonoy;

maglikay na dai magpukan

an saindong iniidung-idungan—

ta dai man kamo puwedeng maatong

na sana pag an uran sige-sige na.

Ki Bembem.