Kan Ako Sadit Pa

 

 

Kan ako sadit pa, pitong taon o labi pa

nagasakat na sa bulod, sa bitis kan Isarog.

makua nin omlong, sungong panggatong

pagka-pangudto ásta nang mag-hapon.

 

May bayawas na hinog, an iba inuulod;

kurumbot na hubal, minsan daing laog.

Santol na Bangkok dakul sa may ba’bul;

manggang maalsom, abot pag tinukdol.

 

Langit mayong panganuron,

sa itaas kan bulod maduroson;

hiling an banwa, dagat na mahiwason.

 

Dakul nauusipon ki Nene na maugmahon,

kaibahan maglabar pag abot kan sinárom.

 

Malipoton na tubig sa hararom na bubon,

nagwawaswas hibo kan amor seco saka gogon.

Kun haloy magbuntog, an tubig minalibog.

 

Parehong mahaha’dit, tibaad mahagupit;

listo an dalagan pasiring sa kusina

linilikayan an gihoy ni Mama.

 

Pero kun an bado ba’gong bulos na

kinua hali sa mga ba’gong laba,

si Mama mayo nang masasabi pa—apuwera

apodon an gabos para mag-bendisyon

sa Sagrado Corazon na minsan milagrohon.

 

Sarong aldaw nag-agi na naman

pagmate ko garong kinarigosan—

dawa baga naglabar lang.

Sa ugma kan buhay ako nabubu’lusan,

yaon an tugang, yaon an magurang.