Dakulang Kalugihan

Or How Memories Are Lost Or Stolen Because They Aren't Made in the First Place

Dakul an kalugihán kan mga estudyante nin huli kan pandemyang ini.

Bakò tà dikit o mayo sindang nanonòdan sa mga module na itinatao o sa Google Classroom na pinapagibo.

An pagkanood ngonyan gamit an module o internet yaon sa sadiri nindang panghingowa na intindihon an mga leksyon kan saindang mga maestro sagkod maestra.

Mayo ini sa saindang magurang, mayo sa maestra. Pwedeng makanood an siisay man sainda kawasa pipilion gugustuhon gigibohon ninda ini.

Alagad an mamondo ngonyan ta—an mismong social life ninda an nagsasapò.

Si kadakuldakul na oportunidad kuta na nindang mabisto an mga kaklase o kagurubay, o maintindihan an pagkatawo sagkod pagkanood kan saindang mga maestro sagkod maestra—na iyo man sana nanggad an matatada mawawalat maroromdoman pag-agi kan panahon—an mga ini dai na ninda makukua.

Dawa idtong haralìpot na panahon o pagkakataon na iyo an mabilog kan saindang mga alaala kan saindang elementarya, sekondarya—dai na mangyayari.

Máyò na.

Idtong darakupan daralaganan sa may pahurusan o sa likod kan daan nang Marcos Type—o si arambagan rulutuan karakanan sa Home Economics kan Gabaldon Building.

O idtong pagkahiling pagkatagalpo paglikaw sa hinahangaan na kaklase na uto’doy—uminagi sa Wooden Building?

Si hirilingan surubahan hurulnakan sa Hernandez Hall; si koropyahan hiringhingan purusngakan sa O’Brien Library?

Ano an saindang babalikan bubuweltahan maroromdoman pag sinda na gururang?


#BikolBeautiful